قصيده بعنوان...... أيام زمان
غنى لى غنى زى زمان
عن الأصاله والوجدان
والحب بنا والروقان
أيام مكان للفن مكان
كانوا الأهالى ف حينا
مافيناش مخادع وسطنا
كانت القلوب متجمعه
والقعده واحده تضمنا
أهل وجيران كلنا
والسهره تحلى ويا الأحبه
وماكنش شيئ بيهمنا
كانت القلوب دايبه هيام
والست تقول أحلى كلام
وعبد الحليم يقول موعود
وأغانى الضفه والحدود
كنا بنبكى من قلبنا
وبندعى ليهم كلنا
يارب تمم نصرنا
والله وأكبر يابهيه
لمتنا كانت لمه هنيه
وسط المحن وف الأفراح
العشره كانت بنا قويه
دلوقتى ليه متفرقين
عايشين ولكن مش عايشين
والغش ليه ساكن بيوتنا
والرحمه ماتت من سنين
والطيب ليه أصبح حزين
مبقاش بيفرح من سنين
فيه شيئ متغير يازمان
فين المحبه والحنان
والحق ليه أصبح ضعيف
والظلم تبت ف المكان
والناس تملى تقول يا أمان
وشبابنا سارح ف التواهان
يرحم زمان وأيام زمان
زى ماغنوا ف الألحان
قول للزمان أرجع يازمان
كلمات الشاعر محمد ثروت عبدالحفيظ
ليست هناك تعليقات:
إرسال تعليق