صِيحْة امْرَة
صِيحِي يا امْرَة ٬
يا امَزيغِية حرَّة
من فُوقْ ٠٠٠
طْلَقْتي تَنْهيدَة ،
صوْتَك عالِ
فاتْ ٠٠٠
تْلال وجْبال
دوَّى٠٠٠
اغْصان لَشْجار
عْلَ اكْتافَك ٬
اغْنَسْتي الحَنديرْ
ؤ مايا فْ هْوَى
انْغامْ كَطِّيرْ٠٠٠
بها ٠٠٠
تَبْدايْ لَقْصيدَة ،
تْبوحي وْ تَحْكي
لينا٠٠٠
من ايامْ بْعيدَة ،
تْعَدِّي حْياة
عْلَ ناسْ مرَّات ٬
ؤ عاشْت ٠٠٠
شْقاوَة وْ مأْ ساة ،
امْرَة اتْهانْت ،
ؤ اتْغَصْباتْ ٠٠٠
من كرامْتْها
تْجَرْدات ،
طَفْلَة مَ اقْراتْ،
بالجَهْل والامِّية
تلْبْسات٠٠٠
راجَلْ فْ ضْروفْ٬
صْعيبَة٠٠٠
ضْلْوعو تْعْوْجاتْ
صيحي٠٠٠
وْ صيحي يا امْرَة ،
يا أمزيغيّة حرّة
نْغَمْتَك مْعَ سْواڭي،
سْراتْ٠٠٠
صْدى الجبال
عليها ردَّات٠٠٠
فْ كلْ مجْمعْ تْسْمْعات
الفَّامْ عليها دْواتْ
مايا مَلْ الاعماقْ
حرْقاتْ خْواطَرْ
وْ ڭلوبْ تْهَزَّات٬
ليك وجَّهْتي العِين
خلِّتي قيمْتكْ فْ
ميزان ماتْهينْ
صيحي يا امْرَة،
يا امزيغية حرّة
بْصَوْتك
طْلَقْتي تَغْريدةْ ٠٠٠
فْ عيونك
الدنيا اخْضارْت٠٠٠
و النوَّارة تْفَتْحاتْ
حيّاتْ خيوطْ الشّمس
ؤ ليها تَحْناتْ
اخْديتي لونْ لَقْمرْ
ؤ بْلادَكْ زَهْرات٠٠٠
صيحْتك منْ راسْ
الجبْل ولاَّت
قَطْعاتْ بْحورْ
ؤْصدَّاتْ الآهات٠
للحب والامل
غنيتي٬
للسلم انتِ ناديتي
صيحي٠٠٠
ؤ صيحي يا امْرَة
يا امزيغية حرّة ٠٠٠
جميلة بلهنبل/ مكناس
ليست هناك تعليقات:
إرسال تعليق