هى بردو حبيبتي كانت تشبهك
من ملامحك.. وابتسامتك ..
لون خدودك..
حتى رنه خطوتك.
كانت هي عود ريحان
بالمحبه بينزرع
واما كات عنى تغيب
حاسه قلبى بينخلع ..
زيك تمام
قمرى وحياتي اللى نور دنيتى
وكأنها بدر التمام مالي عليا وحدتي
هى لسه حب عمرى
انسى وسهرى
ليلى وفجرى
مش اى واحده والسلام
انتى ايوه تشبهيها
فى الملامح
فى الغناوى
فى الحكاوى ...
فى السكوت
حتى الكلام
بس هي مكنش يوم فيه زيها
.طول عمرها
صفحه بيضه مخضره
سما وصافيه مفيهاش لمحة من الغمام
ايوه كانت فجر بكر
زى الحمام ...
رسول سلام
سطرين كلام
فيهم تدوق كل المعانى
تعرفى .....
لما كنت ازعل واغضب
الاقيها ديما ايد ..تطبطب
واما بيزيد انفعالى
منى تهرب
لما اهدى ..كات تقرب
تربط على كتفى بأيدها
والتانيه تمسح لي جبينى
هي لسه نن عيني.
تملى كفوفها تقوللى اشرب
هي دمي اللي ف وريدي ...
لساها شمعة بضيها
تكسر الضلمه اللعينه
ايد امينه ...
تملى شهد الدنيا منها
وتقولى اشرب
ارشف الشهد اللى نازل من اديها
نبع صافى..ادوق واهرب منها ليها
ولفين راح اهرب
الا ليها ...
انسي اني جايز اهرب منها ليكي..
يا حنان الدنيا كله اللى ف عنيكى
يا سعاده قلبى لما ابتسامتي تلتقيكي
يا نايات الكون بحاله اعزفيلى وقسمى
واحضنينى من غير حروف إتكلمى
وارسمى فجرى اللى أتى
وانسى احداث النهاية
أعذريني قلبي دا مش ملك ايدي
لو كان بأيدى
ابيع كل اللى باقى من حياتى
واشتريكى
ومش كفايه
واكتب بايدى لعمرى سطرين نهايه
واشتريلك عمر تانى ملك ليكي
لسه فاضل منى يدوب.
حبه امانى
انى اشوفك ولو مرة
حتى ف منامى
#صبري جاب الله
ليست هناك تعليقات:
إرسال تعليق