فيه ناس كتبت كتب من ورق
و ناس كتبت كتب من حجر
و ناس ماتت من سنين
و لسة كلمتها مسطورة
على قلوب البشر.
و فيه كتب مكتوبة على الجبين
بيقولوا ان اللى عالم بيها القدر.
و فيه اللى يساعدك عشان تقدر.
و اللى يكسر مقاديفك
عشان ما تقدرش.
و اللى يقدرك لله فى لله كدة
و اللى مهما اديته ما يقدرش.
و فوق الكل صاحب القدرة
اللى يقدر وحده
و يدى القدرة للى ما يقدرش
و هنجرب تانى
و نروح بعيد ليه
و نفضل نعيد و نزيد فى الحكاوى.
معلمنا سليمان قال زمان
و كتبوا كلامه فى الأمثال
و كتبوا كلامه غناوى.
أفكرك باللى قاله زمان
يالى انت على الفرح ناوى.
كل اللى بنشوفه
اللى قبلنا شافوه.
و كل اللى بنعيشه
اللى قبلنا عاشوه.
و لسه الواحد مننا
أول ما بيتعلم القسوة
بيتعلم القسوة فى اللى حبوه.
غريبة أوى ان الناس
دايما بتنسى
ان أول قتيل على أرضنا
اللى قتله أخوه.
و خلاصة الأمر كله.
أن تتقى الله و تصنع وصاياه.
ليكون لك مكانا عنده
عندما تعود الى سماه.
فمهما طال عمرك
و ارتفعت متمجدا
فمصيرك يوما الى لقياه.
الشاعر العجوز
مرقص اقلاديوس
ليست هناك تعليقات:
إرسال تعليق