#وداع_ياأمّه
على كل اللي جي و راح
سماح يا أمّه
على العمر اللي كله جراح
سماح يا أمّه
على القلب اللي مات و ارتاح
سماح يا أمًه
على الأيام و ع الأفراح و ع اللمة
سماح يا أمّه
عن الطبلية و فطارنا
أدان الفجر
و عن لمتنا و خبيزنا
و نومة العصر
عن الكحكة اللي خبيتها
عن الضحكة و رنتها
و عن حضنك و أنا خايفة
ف ليلة العمر
عن السكة اللي مشيناها
و حفظتنا
عن الترعة اللي رويناها
و روت غيطنا
عن التوتة عن الساقية
عن اللقمة اللي كات باقية
عن القاعدة قصاد بيتنا
عن المش اللي ف الزلعة
عن الشمعة اللي كات والعة
و عن أيام مهيش راجعة
و عن جارنا و جارتنا
و عن كوز الدرة المشوي
و شاي الركوة
ف عز الدنيا مابتشتي
و عن خالي و عن عمّي
و عن ستّي
عن القصب اللي مصمصته
هناك ع السطح
عن الضرس اللي انا خلعته
و راح للشمس
عن الشلن اللي ضيعته
عن الكلب اللي انا ربطته
و عن أجمل عروسة قماش
و فارس قش
و عم حسين و مصطبته
عن الكُتاب و شيخ مرسي
عن الفلكة اللي ع الكرسي
عن الفجر اللي شقشق
فوق شواشينا
و قش الغلة
بيشكشك ف رقابينا
و عن دنيا مبندقش لفين ترسي
عن العمر اللي عدى و ضاع
وداع يا أمّه
عن الراحة عن الأوجاع
وداع يا أمّه
عن الكحل اللي ف عينيكي
عن الحنة اللي ف إيديكي
عن الفرحة اللي بعد غياب
عن اللهفة عن الضمّة
عن الآحباب
وداع يا أمّه
..
الام لولو
نجلاء عزت
ليست هناك تعليقات:
إرسال تعليق