مستنظراك/بقلم الشاعره/عبير الجندى

؛؛ مستـنـظــــــراك ؛؛؛

************************

لما الهوى يا حبيبى جانى ..

ودق ع الشباك .. لقيتك ع الطريق

زى البريق .. 

جوه ليالى العتمه والليل الطويل

قنديل بيضوى جوه روحى المتعبه

ونسيم بيشبه مركبه ..

فى بحر صافى بدون شطوط

عايزه أفوت وياك .. أعدى المستحيل

يا عين يا ليل .. أنا مش أنا

أنا قلب غير القلب ..

ناسيه كل خطوه مُحزنه

وأميره قدام البشر

ويايا بدر بدور بميت مليون قمر

إسمى وإسمه ع الشجر

والكل بعد هواك صبح لىّ صديق

لما الهوى يا حبيبى جانى ..

ودق ع الشباك .. لقيتك ع الطريق

أنا قلت إن الفرح جانى .. يدق بابى من جديد

أنا قلت إن النور هايدخل تانى ..

جوه البيت وهاتهنى معاه

أنا قلت ليك الله .. على كل اللى كان

صبح المكان يا حبيبى .. بوجودك أمان

وقدرت أكتب أغنيه

بانت على بعد النظر .. أحلى وأغلى أمنيه

وصبحت أحلى من جميع الكائنات

حسيت بأنك .. أغلى من كل الحاجات

وانك هرم .. 

مفتوح لقلب اللى انحرم

إنك جسور للحب .. بتوصلنى

تانى لكل حاجه مبهجه

وانك طيور .. خضره فى كل الأنسجه

وانك قوارب للنجا .. 

يا حبيبى .. يا أول ندا لىّ فى أنحاء الحياه

يا حبيبى يا نجمة محبه للى تاه

الله عليك فى طلعتك

طاهره تملى ندهتك

ياللى انت خليت العيون ..

دايما لرؤياك الحبيبه .. مشتاقين

ياللى انت شلال الحنين

راح الأنين من روحى ..

لما قابلت طيفك فى الخيال

واما اتقابلت معاك

لقيت الفرحه أكبر م الخيال

ولقيتنى شئ طاير .. ما بين كل السحاب

يا حبيبى ونسيت الصحاب

ولا بفتكر غير النصيحه الأخرانيه

أخلى بالى م الجميع

لو يوم هآمن للبشر لازم أضيع

هانسى خريف الدنيا بيك

يا حبيبى يا أجمل ربيع

يا اللى عنيك الطاهره لىّ دليل ..

إذا طال السفر

يا اللى انت فى حضن القمر

إحمينى من عذر الليالى ..

كل سكه فى عمرى مليانه خطر

واسقينى من قلة سعادتك يا حبيب

الليل هايصبح باللقا زى الحليب

والخوف هاينسى قلبنا

طول ما انت ويا الحب ماشى جنبنا

أرجوك تخلى البال علىّ فى الطريق

وتراعى فىّ ربنا

************************

عبــــــــــير الجنــــــــــــدي