**** ماتشيلش هم. *****
مرة لاقيتنى باكلم نفسى
يعنى كأنى واحد صاحبى
واخد وادى. ... بينى وبينى
واناقش نفسى بس ف سرى
نفسى قالتلى
عاجبك وضعك
قلت لنفسى
ماله وضعى
أيوه عاجبنى
فكك منى
وضعى أحسن م اللى ف سنى
نفسى قالتلى
اوعى تخبى
وضعك مزرى
بص لنفسك وسدت نِفسَك
عايش زى الجثة الهامده
وضحكة وشك باقت جامده
حتى الصحة ... مش ولابد
وخطوة رجلك مابقتش تمد
لبسك كله ... ألوان باهتة
والتسريحة قديمة وثابتة
فين الذوق ... وفين الحس
حتى اللقمة .. من غير نفس
كل الوقت ... قاعد بتفكر
ومن الهم ... جالك السكر
فين القلش ... وفين قفشاتك
واللمة الحلوة .. ويا صحابك
فين الضحكة اللى بصوت عالى
نفسى ترجع ... تضحك تانى
إرجع تانى ... ودلع نفسك
حتى مرة ... كده من نِفسَك
عمر الهم ... مايصلح حال
ولا بيكسب ... أبداً مال
إرفع إيدك. ... وإدعى لربك
ربك وحده ... يفرج همك
ربك وحده ... يفرج همك
أحمد أبو عاصم
ليست هناك تعليقات:
إرسال تعليق